Ikipe ya Fenerbahçe yo muri shampiyona y’icyiciro cya mbere muri Turukiya yemeje ku mugaragaro ko yirukanye Jose Mourinho wari umutoza wayo, nyuma yo kunanirwa gukatisha itike y’imikino ya UEFA Champions League 2025/2026.
Fenerbahçe yatangaje iri tangazo ku mbuga nkoranyamabaga zayo ku wa Gatanu igira iti:“Twatandukanye na Jose Mourinho, wabaye umutoza w’ikipe yacu kuva mu mwaka w’imikino wa 2024-2025. Turashimira imbaraga zose yakoresheje ku ikipe yacu kandi tumwifurije amahirwe mu hazaza.”
Jose Mourinho, umutoza ukomoka muri Portugal, yatoje amakipe akomeye ku rwego mpuzamahanga arimo Real Madrid, Chelsea, Manchester United, na Inter Milan. Yirukanywe nyuma yo gutsindwa na Benfica 1-0, bituma Fenerbahçe ibura itike yo gukina UEFA Champions League ya 2025/2026.
Iki gihe cyabaye mu masaha macye nyuma y’uko Ole Gunnar Solskjaer nawe yirukanywe na Besiktas kubera kutabasha kubona itike y’imikino ya Conference League.
Mourinho yatoje Fenerbahçe mu mikino 62, aho yatsinzemo 37, agatsindwamo 11 gusa. Mu mwaka ushize w’imikino, yafashije ikipe kugera ku mwanya wa 2 muri shampiyona, n’amanota 11 nyuma ya Galatasaray yegukanye igikombe.
