Abarwanyi b’umutwe wa AFC/M23 bigaruriye uduce dutandukanye two muri Teritwari ya Walungu, turimo n’Umujyi wa Nzibira uzwiho ubukungu bushingiye ku mabuye y’agaciro nka zahabu na gasegereti, ndetse ukaba n’amarembo akomeye yerekeza muri Mwenga na Shabunda.
Ibi byabaye ku Cyumweru, tariki ya 21 Nzeri 2025, nyuma y’imirwano ikaze yashyamiranyije M23 n’ihuriro rya Wazalendo rifatanyije na FDLR. Raporo zigaragaza ko Wazalendo bari bagabye ibitero mu nkengero za Nzibira, bikagira ingaruka ku baturage b’inzirakarengane.
M23, bivugwa ko yirwanyeho, yaje kwigarurira ibice byinshi byari bifitwe na Wazalendo na FARDC. Mu duce twaguye mu maboko ya M23 harimo Cisaza, Cibanda, Muyange, Karhuliza na Kalongo, ahakunze kuba indiri y’ibitero bya FARDC n’inyeshyamba zifatanyije nayo.
Umujyi wa Nzibira ufatwa nk’ufite agaciro k’ikirenga muri Kivu y’Epfo, kuko usanzwe ari ihuriro ry’ubucukuzi bw’amabuye y’agaciro ndetse ukaba n’icyicaro cy’ingenzi cy’imirwano. FARDC ngo yawukoresheje nk’ikiraro cy’amayeri yo gutegura ibitero byagombaga guhangana n’umwanzi, mu gihe Wazalendo bo bakomeje gucura abaturage buhoro buhoro.
Radio Okapi, ikorera hafi y’ubutegetsi bwa Kinshasa, yatangaje ko Wazalendo bisubiye inyuma mu rwego rwo “kurengera ubuzima bw’abaturage.” Ariko amakuru ava mu bindi binyamakuru avuga ko bamwe mu bayobozi babo b’imitwe yitwaje intwaro bigaruriwe n’iyi mirwano.
Abarwanyi bigize abajenerali barimo Maheshe Simba, Josuè Nyambamba, Mubangu Mussa, Ngandu (alias Baleine), Justin Mabala, Kafufa Windema na Ndarumanga Muyololo, bose bari bafashijwe n’abayobozi b’ingabo za FARDC muri ako gace, ariko nyuma yo gutsindwa bamwe bahungiye Mwenga abandi basubira Shabunda.
Amakuru yizewe avuga ko aba bayobozi batabashije no kuramira intwaro n’amasasu bari bahawe na Leta ya RDC, zari zigamije gukumira ko Nzibira igwa mu maboko ya M23.
Nanone ku Cyumweru, FARDC ifatanyije na Wazalendo na FDLR, bagabye ibitero ku bice bigenzurwa na AFC/M23 muri Masisi na Walikale, bikaba na byo byagize ingaruka zikomeye ku baturage basivili.
