Ikigo cy’igihugu gishinzwe ibizamini n’ubugenzuzi bw’amashuri, NESA, cyatangaje ko abanyeshuri 255.498 bazakora ibizamini bisoza icyiciro rusange cy’amashuri yisumbuye n’icya kabiri guhera ku wa 9 Nyakanga 2025.
Mu cyiciro rusange, abanyeshuri 149.134, barimo abakobwa 82.412 n’abahungu 66.722 biga mu mashuri ya Leta n’ayigenga ni bo bazakora ibi bizamini.
Mu cyiciro cya kabiri, ibi bizamini bizakorwa n’abanyeshuri 106.364 ni bo bazabikora barimo abakandida bigenga 5283. Barimo abakobwa 55.435 barimo 3.382 bigenga n’abahungu 45.646 barimo 1.901 bigenga.
Iyi mibare igaragaza ko abakobwa bakomeje kwitabira amasomo mu mashuri yisumbuye ku rwego rushimishije, bikaba ari ikimenyetso cy’uko gahunda zo guteza imbere uburinganire mu burezi zitanga umusaruro.
NESA yashimangiye ko imyiteguro yagenze neza, harimo kugemura ibikoresho by’ibizamini, gutegura ibigo bizakorerwaho, no guhugura abazagenzura ikorwa ry’ibi bizamini.
Ababyeyi n’abarimu basabwe gukomeza gufasha abana mu buryo bushoboka mu gihe bari mu myiteguro ndetse bakazashyira imbere ikinyabupfura no kwirinda uburiganya bwagaragara mu gihe cy’ibizamini.
Iki kigo cyatangaje ko kizakomeza gukurikirana uko ibizamini bigenda hirya no hino mu gihugu, mu rwego rwo kwirinda icyahungabanya umutekano n’umucyo w’iki gikorwa kigamije guteza imbere uburezi.
Biteganyijwe ko ibizamini bya Leta mu mashuri yisumbuye bizarangira tariki ya 18 Nyakanga 2025. Bizakorerwa mu bigo by’amashuri 1.595.
