AFC/M23 yatangaje ko hari bamwe mu basirikare b’u Burundi bakomeje kugaragaza imyitwarire iteye impungenge muri Kivu y’Epfo, nubwo bagenzi babo benshi bamaze gusubira mu gihugu cyabo nyuma yo gutsindwa ku rugamba i Uvira.
Mu itangazo iri Huriro ryashyize hanze ku wa Kane tariki ya 11 Ukuboza 2025, nyuma y’impinduka zigaragara zabaye nyuma yo gufata Umujyi wa Uvira, ryavuze ko hari abasirikare b’u Burundi bakomeje kwanga kuva ku butaka bwa Repubulika Iharanira Demokarasi ya Congo, bakiyubakira ibirindiro mu misozi miremire y’aka gace.
AFC/M23 ivuga ko nubwo ingabo nyinshi z’u Burundi zasubiye mu gihugu cyazo nyuma yo guhura n’ihurizo rikomeye mu mirwano, hari itsinda ryinshi ry’abataracika intege, rikomeje kwitsimba mu imisozi ya Kivu y’Epfo mu gihe abaturage n’imiryango itandukanye bakomeje gusaba ko haboneka ituze n’amahoro.
Mu gitondo cyo kuri uyu wa Kane, nk’uko bivugwa n’Umuvugizi wa AFC/M23 mu bya Politiki, Lawrence Kanyuka, ngo bamwe muri abo basirikare b’u Burundi bagerageje kugaba ibitero mu gace ka Minembwe, hatuye Abanyamulenge b’Abatutsi, bakoresheje intwaro ziremereye. Ibi ngo byahitanye ubuzima bw’abasivile barimo abagore n’abana.
Kanyuka ashinja ubutegetsi bwa Kinshasa gukomeza ibikorwa bigamije kurengera bamwe no kurimbura abandi bo mu Burasirazuba bwa DRC, ahamya ko AFC/M23 izakomeza guhagarara ku ntego yo kurinda abaturage ntihabwe icyuho.
Iri huriro ryongeye gusaba Leta y’u Burundi gukurayo byihuse abasirikare bayo basigaye ku butaka bwa DRC, kugira ngo habeho umusanzu mu kugarura ituze n’amahoro.
