Ubushinjacyaha bw’urwego Rwisumbuye rwa Musanze bwatangaje ko bwatangiye gukurikirana abantu 15 bakekwaho uruhare mu bikorwa byo kunyereza amafaranga y’Ikigo cya Gisirikare cy’Ubwishingizi ku Ndwara (MMI).
Abakekwa barimo bamwe mu baganga bakora mu mavuriro yigenga, abanyamuryango ba MMI ndetse n’abakozi ba za farumasi zo muri aka karere.
Amakuru y’Ubushinjacyaha yerekana ko aba bantu bakoranaga mu buryo bwihariye mu gucunga inyandiko z’ubuvuzi, bakazihimbamo ibisobanuro bitajyanye n’ukuri kugira ngo bishyurwe serivisi zitatanzwe.
Ubushinjacyaha buvuga ko amavuriro hamwe na farumasi bafatanyaga n’abanyamuryango ba MMI ku buryo bashyiraga imiti, isuzuma n’ibindi bikorwa by’ubuvuzi ku byemezo by’imishyurire nyamara ntibibe bitakozwe.
Ibyo bikorwa byamenyekanye biturutse ku munyamuryango wa MMI watanze amakuru ko hari amavuriro yo mu Mujyi wa Musanze yakoraga ubu buryo bushyira mu gihombo Ikigo cya MMI. Uyu mutangabuhamya yavuze ko umuntu yajyaga kwiyitirira umurwayi, agatanga ikarita ya MMI, umuganga akamwandikira imiti y’indwara adafite.
Nyuma, farumasi yabaga imaze kumenya uwo mugambi, ikakira iyo ‘ordonance’ hanyuma aho guha “umurwayi” imiti, bakamuha amafaranga bagombaga kwishyurwa n’Ikigo cya MMI.
Kubera ubu buryo bwari bwarakuze, buri munyamuryango wajyaga kwiyitirira umurwayi yahabwaga amafaranga agera ku 7 000 Frw by’uburiganya. Nyuma yo gutangazwa kw’aya makuru, inzego z’umutekano n’iperereza zatangiye kugenzura zifata bamwe mu bakekwa basohotse muri farumasi bamaze guhabwa amafaranga.
Aba bantu bose bakurikiranyweho icyaha cyo guhimba no gukoresha inyandiko mpimbano, nk’uko biteganywa n’ingingo ya 276 y’Itegeko nº68/2018 ryo ku wa 30/08/2018 rigena ibyaha n’ibihano muri rusange. Banashinjwa icyaha cyo kunyereza umutungo, gihanwa n’ingingo ya 10 y’Itegeko nº54/2018 ryo ku wa 13/08/2018 ryerekeye kurwanya ruswa.
Ubushinjacyaha bukomeje gukusanya ibimenyetso byose kugira ngo dosiye y’abaregwa ishyikirizwe urukiko, mu gihe hagikomeje kurebwa niba hari abandi bashobora kuba baragize uruhare muri ubu buryo bwo kunyereza umutungo wa MMI.
