Mu gitondo cyo kuri uyu wa Kane, bamwe mu bakinnyi ba APR FC bari bamaze iminsi bari mu makipe y’ibihugu, basubiye mu mwiherero w’iyi kipe iri kwitegura guhura na Al Hilal SC yo muri Sudani ku wa Gatandatu tariki ya 13 Nzeri 2025.
Abarimo Mugisha Gilbert, wahesheje Amavubi intsinzi ubwo yatsindaga Zimbabwe iwayo igitego 1-0, Ishimwe Pierre, Fitina Omborenga ndetse na kapiteni Niyomugabo Claude, bageze muri Tanzania mu rukerera rwo kuri uyu munsi, bahita bajya gusanga bagenzi babo kuri hoteli ikipe icumbitsemo, bava yo berekeza mu myitozo.
Na ho abandi bakinnyi babiri, Ssekiganda Ronald na Denis Omedi, bari bamaze gufasha Uganda Cranes kwikura imbere ya Somalia na Mozambique, bahise bageza i Dar es Salaam mu masaha make mbere y’uko imyitozo itangira, bitabira ako kanya.
Umukino wari uteganyijwe ku wa Gatanu saa Sita n’igice ku isaha yo muri Tanzania, washyizwe ku wa Gatandatu mu masaha amwe. Impamvu z’iri mpinduka ntabwo ziratangazwa n’abategura irushanwa rya CECAFA.
