Imitwe myinshi y’Ingabo z’u Burundi yinjiye mu Mujyi wa Uvira, uherereye mu burasirazuba bwa Repubulika ya Demokarasi ya Congo (RDC), inyura ku mupaka wa Kavimvira, aho yahasanze Ingabo za Leta ya Congo (FARDC) zifatanyije n’inyeshyamba za Wazalendo, nyuma y’iminsi mike umutwe wa AFC/M23 uvuye muri uwo mujyi.
Amakuru aturuka mu nzego za sosiyete sivile zikorera muri ako gace avuga ko izi ngabo z’u Burundi zinjiye muri Uvira mu gitondo cyo kuri uyu wa Gatatu, zikaba zabanje guteranira kuri rond-point ya Kavimvira mbere yo koherezwa mu bice bitandukanye bifatwa nk’ingirakamaro mu mujyi wa Uvira no ku muhanda uhuza uwo mujyi n’Ikibaya cya Rusizi.
Umwe mu baturage wabonye ibyo bikorwa, utifuje ko amazina ye atangazwa, yabwiye Kivu Morning Post ko Ingabo z’u Burundi zagennye cyane mu gucunga umutekano wo mu axis y’Ikibaya cya Rusizi kugera mu gace ka Kiliba.
Ati: “Ingabo z’u Burundi zamaze kugera muri Uvira. Nabonye zitangiye gukorera kuri rond-point ya Kavimvira muri iki gitondo. Zaje kongerera imbaraga umutekano mu nzira y’Ikibaya cya Rusizi kugera Kiliba. Ntabwo bazoherezwa i Makobola, aho hasanzwe hari izindi ngabo.”
Aya makuru akomeza avuga ko abarwanyi ba AFC/M23 baba barasubiye inyuma berekeza mu gace ka Sange, kari mu ntera ya kilometero zigera kuri 30 mu majyaruguru ya Uvira.
Koherezwa kw’izi ngabo z’u Burundi bigamije, nk’uko bivugwa n’amasoko atandukanye, kongerera ingufu ibirindiro bya FARDC na Wazalendo, hagamijwe kwitegura mu gihe imirwano yakongera kubura no gukumira ko Umujyi wa Uvira wakongera kugwa mu maboko ya AFC/M23.
Twibutse ko ku wa 18 Mutarama 2026, Ingabo za FARDC zifatanyije na Wazalendo zongeye kwinjira muri Uvira, aho abatangabuhamya batandukanye bavuganye n’umuryango mpuzamahanga uharanira uburenganzira bwa muntu, Human Rights Watch (HRW), batangaje ko habayeho ibikorwa by’ubusahuzi no gusenya imitungo y’abaturage, by’umwihariko iy’Abanyamulenge, ndetse n’imitungo ya Leta.
Kubera izo mpungenge z’umutekano, imiryango myinshi y’Abanyamulenge yahisemo guhungira mu gace ka Kamanyola, kari mu maboko ya AFC/M23, aho bavuga ko babona umutekano wabo wizewe kurushaho.
