U Rwanda rwohereje muri Jamaica itsinda ry’abasirikare b’inzobere mu bwubatsi, bagiye gufasha iki gihugu kongera gusana ibikorwaremezo byangijwe n’inkubi y’umuyaga ikomeye yiswe Melissa, iherutse kucyibasira.
Amakuru aturuka mu buyobozi bw’Ingabo z’u Rwanda agaragaza ko aba basirikare bahagurutse ku Kibuga Mpuzamahanga cy’Indege cya Kigali ku wa Gatatu tariki ya 14 Mutarama 2026.
Uku koherezwa kwabaye hashingiwe ku masezerano y’ubufatanye asanzwe hagati y’u Rwanda na Jamaica. Aba basirikare bakaba bakomoka muri brigade yihariye ishinzwe imirimo y’ubwubatsi mu Ngabo z’u Rwanda.
Mbere yo guhaguruka, bahawe impanuro n’Umuyobozi wa Diviziyo irwanisha imodoka za gisirikare, Brig Gen Faustin Tinka, wari uhagarariye Umugaba Mukuru w’Ingabo z’u Rwanda. Yabashishikarije kuzakoresha ubumenyi n’ubunyamwuga bafite, bagasohoza neza inshingano zabo, agaragaza ko ari icyizere gikomeye bagiriwe n’ubuyobozi bw’Ingabo.
Brig Gen Tinka yashimangiye ko ibikorwa bazakora bigomba gutanga umusaruro ugaragara ku baturage ba Jamaica bagiye gufasha, anabibutsa gukomeza kurangwa n’indangagaciro n’imyitwarire myiza biranga Ingabo z’u Rwanda.
Ati: “Izi ni indangagaciro zatumye mugirirwa icyizere cyo guhabwa izi nshingano.”
Inkubi y’umuyaga Melissa yibasiye Jamaica ku itariki ya 28 Ukwakira 2025, igira ingaruka zikomeye cyane mu duce twa St Elizabeth na Black River. Ikigo gishinzwe iteganyagihe cyatangaje ko uyu muyaga wari ufite umuvuduko ugera kuri kilometero 298 ku isaha.
Raporo zigaragaza ko abantu 45 bahitanywe n’iki kiza, mu gihe abandi barenga 15 baburiwe irengero, nk’uko byemejwe n’ishami ry’Umuryango w’Abibumbye rishinzwe ibikorwa by’ubutabazi (OCHA).
Ibikorwa remezo byinshi byangiritse, birimo amashuri agera kuri 450 ndetse n’inzu z’abaturage zisaga ibihumbi 120. Abaturage bagera ku bihumbi 626 bagizweho ingaruka n’iki kiza, aho 950 muri bo basigaye nta macumbi bafite nyuma y’uko inzu zabo zasenyutse burundu.
Banki y’Isi yatangaje ko igihombo cyatewe n’iyi nkubi y’umuyaga kibarirwa hagati ya miliyari 8.8 na miliyari 15 z’amadolari ya Amerika, bikaba bihwanye hafi na 41% by’umusaruro mbumbe w’igihugu cya 
Jamaica.
