Nyuma y’imyaka ine atagaragara mu itangazamakuru, umunyamakurukazi uzwi cyane Fiona Mbabazi agiye kongera kumvikana kuyindi radiyo hano mu Rwanda.
Fiona Mbabazi yamamaye cyane mu gihe yakoreraga Ikigo cy’Igihugu cy’Itangazamakuru (RBA), cyane cyane asoma amakuru mu rurimi rw’Icyongereza, ibintu byamuhesheje izina rikomeye mu mwuga w’itangazamakuru.
Kuri ubu agiye kumvikana kuri Capital FM, imwe mu maradiyo amaze igihe yongera imbaraga mu mikorere n’abakozi bayo.
Itangazwa ry’itangira rye kuri Capital FM ryashyizwe ahagaragara n’ubuyobozi bw’iyo radiyo binyuze ku mbuga nkoranyambaga zayo, aho bwagaragaje ibyishimo byo kwakira uyu munyamakuru mu muryango wayo.
Mu butumwa bwashyizwe hanze, Capital FM yagize iti: “Tunejejwe no kwakira Fiona Mbabazi mu muryango wa Capital FM.”
Uyu munyamakuru azajya yumvikana mu gace kitwa “My 2 Cents with Fifi”, kazajya kanyuzwa mu kiganiro cya mu gitondo gikorwa na Jesse na Juliana, na bo basanzwe ari abanyamakuru bazwi mu Rwanda.
Ubuyobozi bwa Capital FM buvuga ko kwinjira kwa Fiona Mbabazi ari indi ntambwe yo gukomeza kuzamura urwego rw’ibiganiro byayo no gukurura abayumva benshi, cyane ko iyi radiyo imaze iminsi yiyubaka by’umwihariko mu rwego rw’abakozi.
Fiona Mbabazi yari yasezeye RBA ku wa 1 Ugushyingo 2021, nyuma y’imyaka 11 ayikoreye, ahita ajya gukorera Sosiyete y’u Rwanda y’Indege, RwandAir, aho yari amaze igihe akorera mbere yo gufata icyemezo cyo gusubira mu itangazamakuru.
Kugaruka kwe ku mwaduko wa radiyo bifatwa nk’inkuru ishimishije ku bakunzi b’itangazamakuru, cyane cyane abari bamukumbuye mu itangazamakuru ryo mu Rwanda.
