Ubuyobozi bw’Umujyi wa Kamanyola, uherereye muri Teritwari ya Walungu mu Ntara ya Kivu y’Amajyepfo, burashinja ingabo z’u Burundi kurasa ibisasu byinshi muri uwo mujyi, bikavamo urupfu rw’abaturage b’abasivile no kwangiza ibikorwa byabo.
Aya masasu bivugwa ko yarashwe mu minsi ya mbere y’Ukuboza 2025, mu gihe Kamanyola yari iri hafi y’ahaberaga imirwano ikomeye yahuje ingabo za AFC/M23 n’ihuriro ry’ingabo zifatanya na Leta ya Repubulika Iharanira Demokarasi ya Congo, harimo n’iza Burundi.
Iyo mirwano yabereye ahiganjemo uduce twa Luvungi, Lubarika na Katogota, bikarangira izo ngabo zitsinzwe, AFC/M23 ikomeza kwigarurira ibice byinshi birimo n’Umujyi wa Uvira wafashwe ku wa 9 Ukuboza.
Umuyobozi w’Umujyi wa Kamanyola, Hassan Shabani, yavuze ko guhera ku wa 2 Ukuboza, uwo mujyi watangiye kugabwaho ibisasu byarashwe bivuye ku butaka bw’u Burundi. Yatangaje ko muri rusange ibisasu bigera hafi ku 150 byaguye muri Kamanyola, umujyi ufite ubuso bwa kilometero kare zirindwi (Km² 7) utuwe n’abaturage barenga ibihumbi 100.
Yagize ati: “Guhera ku wa 2 Ukuboza, Kamanyola yahuye n’ibisasu bikomeye byaturukaga mu Burundi. Nubwo imirwano nyamukuru yabereye mu ntera ya kilometero zirenga 15 uvuye hano, umujyi wacu wasutsweho ibisasu byinshi byangiza byinshi mu bikorwaremezo.”
Uyu muyobozi yavuze ko ibyo bisasu byasenye inzu z’abaturage, amashuri n’amavuriro, binica abaturage abandi benshi bagakomereka. Yemeje ko byibuze abantu umunani bahitanywe n’ibyo bisasu, mu gihe umubare w’abakomerekeye muri iyo mirwano uri hejuru cyane.
Shabani yagaragaje ko bitumvikana ukuntu Kamanyola yagabweho ibisasu byinshi, nyamara imirwano nyirizina yarimo ibera mu tundi duce nka Luvungi na Lubarika.
Bamwe mu baturage baganiriye n’itangazamakuru batangaje ko bagizweho ingaruka zikomeye. Umwe muri bo yavuze ko umugore we n’abana babiri bakomeretse bikomeye, mu gihe umuturanyi wabo yahasize ubuzima.
Ibikorwaremezo by’ubuzima nabyo byagize ingaruka zikomeye, birimo Ibitaro bya Saint-Joseph, aho ibice byinshi byangijwe n’ibisasu. Ubuyobozi bw’ibi bitaro bwemeje ko bwakiriye abarwayi bari hagati ya 50 na 55 bakomerekeye muri ibyo bitero, harimo 27 bakomerekejwe bikomeye boherejwe kuvurirwa mu Mujyi wa Bukavu.
