Urwego rw’Igihugu rushinzwe Uburezi bw’Ibanze (REB) rwatangaje ko abayobozi b’ibigo by’amashuri batagejeje ku manota 70% mu isuzuma ry’imikorere bakuwe ku nshingano zo kuyobora, basubizwa mu kazi ko kwigisha. Muri abo, harimo abayobozi 349 bo mu mashuri abanza n’abandi 541 bo mu mashuri yisumbuye.
Umuyobozi Mukuru Wungirije wa REB, Dr Flora Mutezigaju, yasobanuye ko iki cyemezo gishingiye ku isuzuma ryakozwe mu byiciro bibiri: irya mbere rikorerwa ku rwego rw’Akarere, rikurikirwa n’irya REB ku rwego rw’igihugu.
Yasobanuye ko isuzuma ryibandaga ku ngingo zitandukanye zirimo icyerekezo umuyobozi aha ikigo, uruhare rwe mu guteza imbere imyigire, imicungire y’umutungo w’ikigo, n’imikoranire n’ababyeyi, kuko ishuri ridakora riryonyine.
Ati: “Ku rwego rw’Akarere, isuzuma ryibandaga cyane ku myitwarire n’uko umuyobozi yiyemeza inshingano ze, byose bigahabwa amanota 100. Ibyavuye muri iryo suzuma byoherezwaga muri REB, na yo igakora irindi suzuma ryimbitse ku mikorere.”
Dr Mutezigaju yavuze ko abayobozi b’ibigo 5 277 ari bo basuzumwe, muri bo 890 bangana na 16% bakaba baragize amanota ari munsi ya 70%, bigatuma bakurwa ku buyobozi.
Yagaragaje ko mu mpamvu nyamukuru zatumye batsindwa harimo imyitwarire mibi, aho wasangaga bamwe batitwara neza mu mikoranire n’abarimu, abanyeshuri n’ababyeyi, ndetse n’uburyo bakemura ibibazo mu bigo bayobora.
Ati: “Ikindi cyagaragaye ni imicungire mibi y’umutungo w’amashuri. Hari abayobozi batitaye ku nshingano zabo, bamwe bagasiba akazi, abandi bagafatwa mu bikorwa byo kunyereza ibiribwa by’abanyeshuri.”
Yongeyeho ko ubumenyi buke mu rurimi rw’Icyongereza nabwo bwagaragaye nk’imbogamizi kuri bamwe, ndetse ko mu bigo byinshi byayoborwaga n’abahagaritswe, umusaruro w’abanyeshuri mu myaka itatu ishize wari waragiye ugabanuka.
Byagaragajwe ko abenshi mu bahagaritswe ari abafite impamyabumenyi y’amashuri yisumbuye (A2), kandi benshi muri bo bakaba bakuze. Mu bayobozi bose basuzumwe, abagabo barenga 3 100 ni bo benshi, mu gihe abagore bari hafi 2 000.
Ibi byatangajwe ku Cyumweru tariki ya 28 Ukuboza, mu kiganiro Urubuga rw’Itangazamakuru.
REB yanashishikarije abagore bakorera mu burezi kwitabira gusaba imyanya y’ubuyobozi, kuko ubushakashatsi bwayo bwerekana ko amashuri ayoborwa n’abagore akora neza ugereranyije n’ayoborwa n’abagabo.
