Abaturage bo mu Murenge wa Kivumu mu Karere ka Rutsiro baravuga ko bakomeje gushegeshwe n’indwara imeze nk’icyorezo imaze iminsi ibibasira, ndetse bakaba batewe impungenge zuko bamwe batabona serivisi z’ubuvuzi kuri Mituweli ku Kigo gito cy’Ubuzima cya Bunyoni kibegereye (poste de sante)
Abatuye muri aka gace bavuga ko iyi ndwara yihinduranya vuba kandi ikwirakwira byihuse mu miryango. Bavuga ko iyo yageze mu rugo rumwe, abarugize hafi bose bahita bayirwara.
Nyirabusiha Venantie, umwe mu baturage, ati: “Iki kirwara cyankubise hasi n’abuzukuru banjye, twese kiratuzambije kandi sinjye njyenyine; ni aka gasozi kose. Urebye cyahereye aha kirazamuka cyurira uyu musozi.”
Sibonteze Albert na we yemeza ko ikibazo cyageze mu ngo hafi ya zose ati: “Mu rugo rwacu twese twanduye, n’abaturanyi ni uko. N’iyo umuntu aryamye arwaye, uwo baryamanye na we bukeye aba ayanduye.”
Aba baturage bavuga ko ikibaremereye nabi kurushaho ari uko Poste de Santé ya Bunyoni itabakira nk’abanyamuryango ba Mituweli, bityo abarwayi badafite ubushobozi bakabura ubuvuzi bwihuse.
Venantie akomeza agira ati: “Turi abatishoboye. Ubundi twafashwa nk’uko abandi barimo kwitabwaho mu tundi duce. Kuri Kivumu ho baradukorera kuri Mituweli, ariko urugendo ruraduhenda iyo Nagiyeyo ngerayo bwije.”
Ayingeneye Dancille na we avuga ko kutagira ubushobozi bw’amafaranga ari imbogamizi ikomeye: “Nabuze imiti, ni yo mpamvu niryamiye mu rugo. Nta bushobozi mfite bwo kwishyura byose. Turasaba ko badufasha bakadutangira imiti tugakira.”
Ku ruhande rwa Poste de Santé ya Bunyoni, Ngabo Pie Denys uhakora asobanura ko kutakira Mituweli biterwa n’uko batarahabwa uburenganzira bwo kuyikoresha yagize ati: “Kubishyuza 100% si uko tubishaka. Ni uko tutarabona uburenganzira bwa Mituweli. Natwe bitudindiza mu mikorere. Twifuza ko ibyangombwa bitangwa na RDB byajya byihutishwa.”
Ubuyobozi bw’Akarere ka Rutsiro bwo ntibwatanze ibisobanuro birambuye kuri ubwo burwayi, ariko mu butumwa bugufi bwoherejwe ku munyamakuru, Umuyobozi Wungirije w’Akarere, Umuganwa Marie Chantal, yemeza ko nta muturage ukwiye gusigara ativuza kubera ubukene, kandi ko ufite ikibazo cy’ubushobozi yagerwaho agafashwa. Yongeraho ko Poste de Santé ya Bunyoni iri mu rugendo rwo kurangiza ibisabwa na RSSB kugira ngo itangire kwakira abafite Mituweli.
ISOKO:RADIOTV10
