Umukinnyi wa filime w’umuyapani, Cary-Hiroyuki Tagawa, wamenyekanye ku bugome budasanzwe muri filime nka Mortal Kombat, yitabye Imana ku myaka 75, nk’uko byemejwe na manager we, Margie Weiner.
Tagawa yagaragaye muri filime zirenga 30 zamenyekanye ku rwego mpuzamahanga, zirimo The Last Emperor (1987) yegukanye igihembo cy’ingenzi, License to Kill ya James Bond, Pearl Harbor, na Planet of the Apes. Yamenyekanye cyane ku ruhare rwe rw’umugome, by’umwihariko muri Mortal Kombat, aho yakinnye nka Shang Tsung, ndetse nizindi.
Manager we, Margie Weiner, yavuze ko urupfu rwa Tagawa ari igihombo gikomeye, agira ati: “Cary yari umuntu udasanzwe, wita ku bantu bose, ufite ibitekerezo byiza kandi ukunda cyane umwuga we. Ibitekerezo byanjye n’umutima wanjye byihariye umuryango we n’inshuti ze bose bamukundaga.”
Tagawa yitabye Imana kubera indwara yo guturika kw’imitsi y’amaraso mu bwonko, izwi nka stroke. Yatangiye kwamamara mu 1987 ubwo yagaragaraga muri The Last Emperor, kuva icyo gihe akomeza kubaka izina ku rwego mpuzamahanga. Byongeye, Tagawa yari afite impano idasanzwe mu kugaragaza abakinnyi bafite’ubugome, ibintu byatumye akundwa kandi atazibagirana mu mateka ya sinema y’isi.
