Abanyeshuri 25 bo mu ishuri Green Hills International College riherereye mu gace ka Bwoga, mu Ntara ya Gitega mu gihugu cy’u Burundi batawe muri yombi na polisi nyuma y’inyubako y’ubuyobozi y’iryo shuri yafashwe n’inkongi y’umuriro.
Aba banyeshuri bakekwaho kwangiza inyubako y’ubuyobozi, irimo n’ibiro by’umuyobozi w’iryo shuri, yahiye burundu, ndetse no kumena amadirishya y’amashuri.
Nk’uko byatangajwe na Nestor Hakizimana, umuyobozi w’icumbi ry’iri shuri, itsinda ry’abanyeshuri bipfutse mu maso bakoresheje lisansi mu gutwika aho hantu nk’uko byatangajwe na Radio na Televiziyo by’u Burundi (RTNC) kuri X.
Inkongi y’umuriro yatwitse amadosiye yose y’ubuyobozi, ibikoresho, imashini, n’inyandiko z’abakozi, ndetse na televiziyo yabikaga amashusho ya camera zishinzwe gukurikirana ibibera mu ishuri ziri mu biro by’umuyobozi.
