Ku wa 10 Ukwakira 2025, igisirikare cya Repubulika Iharanira Demokarasi ya Congo (FARDC) cyasohoye itangazo risaba abarwanyi b’umutwe wa FDLR gushyira intwaro hasi no kwishyikiriza Leta ya Congo cyangwa ingabo za MONUSCO.
Iryo tangazo ryashyizweho umukono na Gen Maj Sylvain Ekenge Bomusa, rivuga ko abarwanyi bazishyikiriza Leta bazafashwa gusubira mu Rwanda mu mahoro. Yibukije kandi abasirikare ba Congo ko gukorana na FDLR bibujijwe, abasaba kwitandukanya na bo.
Gen Ekenge yasabye n’abaturage bakorana n’uyu mutwe guhagarika ibyo bikorwa, ahubwo bagashishikariza FDLR kwishyikiriza ubuyobozi. Yavuze ko nibatabyemera, FARDC izabambura intwaro ku ngufu.
Iri tangazo ryasohotse nyuma y’amasezerano y’amahoro u Rwanda na Congo byasinyiye i Washington DC ku wa 27 Kamena 2025, afatanyije n’ubuhuza bwa Leta Zunze Ubumwe za Amerika. Aya masezerano ateganya gusenya FDLR no kugabanya ingamba z’ubwirinzi u Rwanda rwafashe.
Uko gusenya FDLR biteganyijwe gukorwa
Amasezerano ya Washington avuga ko gusenya FDLR bizakorwa mu byiciro bitatu mu gihe cy’iminsi 90, hakiyongeraho indi 30 yo gushyira ibintu ku murongo mu Burasirazuba bwa Congo.
1. Icyiciro cya mbere: Ni ugusuzuma imbaraga za FDLR, aho ikorera, n’abayifasha. Ibi bizakorwa n’inzego z’ubutasi.
2. Icyiciro cya kabiri: Ni ugusaba abarwanyi gutaha mu mahoro. Abazanga, FARDC izabatera, naho u Rwanda rutangire kugabanya ingamba z’ubwirinzi.
3. Icyiciro cya gatatu: Urwego ruhuriweho n’u Rwanda, RDC na Amerika (JSCM) ruzasuzuma uko gahunda iri kugenda, rurebe niba ibirimo kugerwaho.
Abazemera gushyira intwaro hasi bazacyurwa mu Rwanda, basubizwe mu buzima busanzwe.
Ese RDC irashaka koko gusenya FDLR?
Nubwo FARDC yavuze ko izitandukanya na FDLR, abasesenguzi benshi ntibabyemera. Bamwe bavuga ko ingabo za Congo n’abarwanyi ba FDLR bamaze igihe bakorana. Hari amakuru avuga ko bamwe muri bo barinzwe n’ingabo za Perezida Tshisekedi, ndetse binjiye no mu mutwe wa Wazalendo.
Mu myaka yashize, ubuyobozi bwa RDC bwagiye busohora amatangazo buvuga ko butagikorana na FDLR, ariko ntibyashyirwa mu bikorwa. Urugero, muri Nzeri 2024 bavuze ko bagabye igitero kuri FDLR, nyuma biza kugaragara ko ari ku wundi mutwe.
Hari n’aho abayobozi ba Congo baburiye FDLR ko bagiye kuyitera, uyu mutwe ugahita uhindura ibirindiro. Abarwanyi bayo banahinduye imyirondoro biyita Abanye-Congo kugira ngo birinde kuboneka.
U Rwanda ruvuga ko rufite amakuru yose
Minisitiri w’Ububanyi n’Amahanga w’u Rwanda, Olivier Nduhungirehe, yavuze ko nubwo FDLR yahinduye amazina, u Rwanda rufite amakuru ahagije ku byo ikora n’aho iri.
Yagize ati: “Aho bari turahazi, n’abasirikare binjijwe mu ngabo za Congo turabazi. Ntibashobora kuvuga ngo ntibazi abo bantu.”
Umuvugizi w’Ingabo z’u Rwanda, Brig Gen Ronald Rwivanga, na we yavuze ko abarwanyi ba FDLR bari hagati ya 7.000 na 10.000, kandi ko iyo bamenye ko bagiye kugabwaho ibitero bivanga n’abaturage.
Nubwo Congo yavuze ko ishaka gusenya FDLR, benshi baracyibaza niba koko izabikora, kuko uyu mutwe umaze imyaka myinshi ukorana n’ingabo za RDC. U Rwanda rwo ruvuga ko rufite amakuru yose ku bijyanye na FDLR kandi rutiteguye kubyihanganira.
