Umunyarwenya w’Umunyarwanda ufite inkomoko muri Kenya, Osmarito OG, uri mu batuma abantu benshi baseka ku mbuga nkoranyambaga, ari mu byishimo bikomeye nyuma yo kugura imodoka ye ya mbere.
Abinyujije ku mbuga nkoranyambaga ze asanzwe akoresha cyane, Osmarito OG yasangije abakunzi be amafoto agaragaza imodoka nshya yaguze, anashyiraho ubutumwa bwo kwishimira intambwe agezeho, aho yagize ati:
> “Congratulations to me — my first key!”
(u Rwanda byumvikanye nk’“Ishimwe kuri njye, imodoka yanjye ya mbere.”)
Ni imodoka yo mu bwoko bwa KIA K5, imwe mu zikunzwe cyane mu Rwanda muri iki gihe, izwiho kuba ifite imiterere igezweho imbere n’inyuma, ndetse ikoresha lisansi n’amashanyarazi icyarimwe (Hybrid), bituma idakoresha ibikomoka kuri peteroli byinshi.
Osmarito OG, umaze kwamamara kubera amashusho asekeje n’ayo yamamaza ibikorwa by’ubucuruzi bitandukanye mu Rwanda, aherutse no kwibutsa ko u Rwanda rwamubereye umugisha.
Yavuze ko yavukiye muri Kenya ku mubyeyi w’Umunyarwanda (se) n’Umunyakenya (nyina), ariko agera mu Rwanda mu 2014, ari bwo ubuzima bwe bwahindutse. Yigeze gutangaza ko mbere yo kuhaza yari yatangiye kwishora mu biyobyabwenge, ariko aho ageze mu Rwanda, yagarutse ku murongo, akubaka izina rye binyuze mu gusetsa no mu kwamamaza.
Kuri ubu, abamukurikira bamuhaye ubutumwa bw’ishimwe n’ubw’umunezero, bamwifuriza ko iyi modoka ari intangiriro y’ibindi byinshi byiza bimutegereje imbere.
