Umukinnyi w’Umufaransa ukinira Paris Saint-Germain, Ousmane Dembélé, ni we wegukanye Ballon d’Or 2025 nyuma yo kwigaragaza cyane mu mwaka w’imikino ushize.
Dembélé, w’imyaka 28, yakinnye imikino 53, atsinda ibitego 35 anatanga imipira 14 yavuyemo ibitego. Yagize uruhare rukomeye mu gufasha PSG kwegukana Ligue 1, ndetse no kwegukana ku nshuro ya mbere mu mateka yayo Champions League, yongera gufasha iyi kipe kugera ku mukino wa nyuma w’Igikombe cy’Isi cy’amakipe.
Mu mikino ya Champions League, yatsinze ibitego 8, anatanga imipira 6 yavuyemo ibitego, harimo ibiri yahaye bagenzi be mu mukino wa nyuma PSG yanyagiye Inter Milan ibitego 5-0.
Umusesenguzi w’umupira w’amaguru Julien Laurens yabwiye BBC Radio 5 Live ko Dembélé “ari we mukinnyi w’ingenzi kurusha abandi bose muri PSG, kandi ari ikipe ikomeye cyane ku isi muri iki gihe.”
Ku ruhande rw’abagore
Umukinnyi wo hagati wa FC Barcelona, Aitana Bonmatí, yongeye kwegukana Ballon d’Or mu bagore, ahigitse Mariona Caldentey wa Arsena
Lamine Yamal yegukanye Kopa Trophy
Umukinnyi muto wa FC Barcelona, Lamine Yamal, yegukanye Kopa Trophy igenerwa abakinnyi bari munsi y’imyaka 21.
Yamal, ufite imyaka 18, yakinnye imikino 55, atsinda ibitego 18 anatanga imipira 21 yavuyemo ibitego. Yagize uruhare mu gufasha Barcelona kwegukana ibikombe bitatu: La Liga, Copa del Rey na Supercopa de España.
Ku rwego rw’igihugu, yafashije Espagne kugera ku mukino wa nyuma wa Nations League, atsinda ibitego bibiri mu mukino wa ½ batsinzemo Ubufaransa 5-4, nubwo nyuma batsinzwe na Portugal kuri penaliti.
Lionel Messi na Cristiano Ronaldo, bari bamaze imyaka 15 bagaragara mu irushanwa rya Ballon d’Or, gusa uyu mwaka ntibigeze banajya ku rutonde rw’abakinnyi 30 bahatanaga.
