Umuganga w’inzobere mu kubaga imitsi y’amaraso mu Bwongereza, wakoraga mu rwego rw’ubuzima (NHS), yakatiwe igifungo cy’imyaka ibiri n’amezi umunani nyuma yo kwikata amaguru ku bushake, kugirango abeshye ibigo by’ubwishingizi ngo ayashyikirizwe amafaranga.
Uwo muganga witwa Neil Hopper, w’imyaka 49, ukomoka i Truro muri Cornwall, yari amaze kubaga abarwayi benshi mbere y’uko mu 2019 yikata amaguru ye yombi.
Urukiko rwa Truro rwasanze Hopper yarabeshye ibigo by’ubwishingizi avuga ko amaguru ye yaciwe kubera indwara, nyamara ari we wari wayakase ku bushake.
Urukiko rwamenye kandi ko muri Gicurasi 2019 ari bwo Hopper yaciwe amaguru munsi y’amavi, nyuma yo kwitera ibikomere bikomeye akoresheje amabarafu yumye kugira ngo byangize amaguru ye.
Mu rukiko, Hopper yemeye ibyaha bibiri byo gukora uburiganya n’ibindi bitatu bijyanye no gutunga amashusho y’ubusambanyi bukabije (extreme pornography) ndetse n’imyitwarire igaragaramo irari ryo gukata ibice by’umubiri ku bushake.
Umucamanza James Adkin yavuze ko nubwo Hopper atigeze akurikiranwaho ibindi byaha mbere, videwo z’ubusambanyi zakoreshejwe mu kumuhamya icyaha zerekana ibikorwa bikabije cyane byo gukata ibice by’umubiri, bigaragaza ubugome bukomeye afite.
Hopper yaciwe amaguru nyuma y’uko yari amaze igihe agaragaza ko arwaye amaguru, ariko ntiyigeze abwira abaganga ko ari we wabyikoreye.
Amafaranga yasabye ibigo bibiri by’ubwishingizi yose hamwe arenga ama-pound ibihumbi 466,000 (hafi miliyari mu mafaranga y’u Rwanda).
Ubushinjacyaha bwavuze ko Hopper yakoze ibi kubera irari ryo gushaka amafaranga, ndetse hari n’ubutumwa yigeze koherereza inshuti ze abibutsa ko nawe akwiye gusahura ubwishingizi.
Nyuma yo gukata amaguru ye, Hopper yasubiye mu kazi nk’umuganga amaramo amezi atandatu, ariko mu 2023 arafatwa, aza no kwamburwa uburenganzira bwo gukora akazi k’ubuvuzi mu Kuboza uwo mwaka.
Nubwo nta bimenyetso byagaragaye ko abarwayi bigeze bangizwa mu gihe yakoraga ubuganga, bamwe mu barwayi babazwe na Hopper bagaragaje impungenge nyuma yo kumva ibyaha bye, bavuga ko bishoboka ko hari abo yabaze atari ngombwa.
Hopper bivugwa ko kuva akiri muto yagiraga ikibazo cyo kutiyumva neza mu mubiri (body dysphoria), ndetse yabonaga amaguru ye nk’ikintu kitamufasha, cyamutera umubabaro udashira.
Ubucamanza bwatangaje ko buzagaruza amafaranga yose Hopper yakiriye mu buriganya, hakoreshejwe itegeko ryo mu 2022.
