U Burusiya bwatangaje ko bugiye kongera gufasha Afghanistan iyoborwa n’Aba-Taliban, cyane cyane mu rwego rwo kurwanya iterabwoba no gufasha iki gihugu guhangana n’ubukungu bushaririye bumaze imyaka myinshi buyogoza abaturage bacyo.
Kuva mu 2021 ubwo Aba-Taliban bongera gufata ubutegetsi, Afghanistan yahuye n’ingaruka zikomeye z’ibihano mpuzamahanga. Amabanki menshi yafunze amadosiye yayo, imishinga myinshi yatewe inkunga n’amahanga irahagarara, ndetse n’abaturage bagera kuri miliyoni nyinshi basigara mu kaga k’inzara. Byongeye, politiki yo gukumira abagore mu burezi n’imirimo ya Leta yakajije igitutu cy’amahanga, bigatuma igihugu gisigara mu bwigunge.
Umunyamabanga w’Akanama k’Umutekano w’u Burusiya, Sergey Shoigu, ubwo yagiriraga uruzinduko muri Afghanistan, yavuze ko igihugu cye kiteguye kongera ubufatanye n’Aba-Taliban. Yagize ati: “Turashaka gufasha mu kurwanya iterabwoba, kurengera ubuzima bw’abaturage ndetse no kurinda ubusugire bwa Afghanistan.”
Shoigu yanenze ibihugu byo mu Burengerazuba bw’Isi, avuga ko bifite uruhare mu kudindiza iterambere rya Afghanistan, bitewe n’uko bashaka inkunga n’inyungu zabyo bwite. Ati: “Aho gufasha abaturage koko, bagiye bahindura Afghanistan ikibuga cya politiki cy’inyungu zabo.”
Afghanistan kugeza ubu iracyugarijwe n’ibibazo bikomeye: abaturage benshi babuze imirimo, abakozi ba Leta bamaze igihe batabona imishahara, ibikorwaremezo birashaje, ndetse n’amazi meza yabaye ikibazo gikomeye mu Murwa Mukuru wa Kabul.
Abasesenguzi bavuga ko uyu mubano mushya hagati y’U Burusiya n’Aba-Taliban ushobora kuba uburyo bwo guha iki gihugu amahirwe yo kongera kwisanga mu ruhando mpuzamahanga, n’ubwo bigikomeje guteza impaka mu mahanga ku bijyanye n’imiyoborere n’uburenganzira bwa muntu muri Afghanistan.
