Umugore w’imyaka 28 witwa Naisae Yona ni we wegukanye ikamba rya Miss Universe Tanzania 2025 mu birori byabereye i Dar es Salaam, bituma ahita abona itike yo guhagararira Tanzania mu marushanwa mpuzamahanga ya Miss Universe 2025.
Mu bihembo byatanzwe, Naisae Yona yahawe imodoka nshya ya Hyundai hamwe n’igihembo cy’amafaranga miliyoni 10 z’amashilingi ya Tanzania (angana n’ibihumbi birenga miliyoni 5 Frw).
Naisae ni umugore w’umwana umwe, ufite impamyabumenyi ya kaminuza mu bijyanye n’Ubukungu, ndetse ni umushabitsi w’ibigo bitandukanye birimo NEY HAIR, Forever Frames TZ X SA, NEY Homes na Bladed-Shaded. Binyuze muri ibi bikorwa, yagiye ahindura ubuzima bw’urubyiruko n’abakobwa, abigisha uburyo bwo kwihangira imirimo no kwigirira icyizere.
Akunda cyane guteza imbere kwigira no kwihangira imirimo ku bakobwa n’urubyiruko rufite intege nke mu muryango. Ubutumwa bwe bw’ingenzi ni gukangurira abagore n’abakobwa kwishingikiriza ku bushobozi bwabo, kumenya gucunga neza amafaranga, no kwihangira imirimo aho gutegereza inkunga y’abandi.
Mu buzima bwe bwa buri munsi, Naisae akunda imyidagaduro n’umuco, birimo guhugura abandi, guteka, no gutembera, ibintu bivugwaho kumufasha gukomera no kuba umuntu ushobora guhuza abantu mu buryo bworoshye.
Nk’icyitegererezo, avuga nyina Lulu Makoi, wamuteye imbaraga zo gukunda umurimo no kudacika intege mu rugendo rw’ubuzima. Ati:
“Mama ni we wambere untera imbaraga, kandi imico ye yo gukorana umurava ni yo ntwaro nyamukuru imfasha kugera kuri byinshi.”
Naisae Yona ni umubyeyi wa kabiri watsindiye iri kamba mu mateka ya Miss Universe Tanzania, akurikira Judith Ngusa, wabaye Miss Tanzania mu 2024.
Kuva mu Kanama 2022, Miss Universe Organization yemeje ko guhera mu marushanwa ya 72, abagore bashakanye ndetse n’abafite abana bemerewe kwitabira no guhagararira ibihugu byabo.
Nyuma yo kwegukana iri kamba, Naisae Yona azahagararira Tanzania mu marushanwa ya Miss Universe 2025, azaba ku nshuro ya 74 ku wa 21 Ugushyingo muri Thailand, ahatanira ikamba n’abandi bagore baturutse mu bihugu birenga 120 ku Isi.
