Umunyarwenya Shizirungu Seka Seth wamamaye nka Seth, yemeje ko yatandukanye na Mucyo Samson uzwi nka Samu, bahoze bakorana mu itsinda rya Zuby Comedy, nyuma y’imyaka irenga ine bari bamaze bahurije hamwe imbaraga mu guteza imbere urwenya mu Rwanda.
Mu myaka ibiri ishize, ibikorwa by’aba bombi byagiye bitandukana, bituma bamwe bibaza niba koko bakigikorana cyangwa se baramaze gutandukana, nubwo bakomeje kugaragara ku rubyiniro nka Zuby Comedy mu bitaramo bitandukanye byabereye hirya no hino mu gihugu.
Mu kiganiro Seth yakoreye kuri Shene ya YouTube ya Inyarwanda yemeje ko we na Samu batagikorana, ariko ko Zuby Comedy nk’izina n’ikirango cy’ibikorwa byo bisekeje kigikomeje kubaho.
Ati: “Ntabwo nyikorana na Samu ariko Zuby Comedy yo iracyahari. Nitwa Seth Zuby Comedy, Samu akitwa Samu Zuby Comedy, ariko twe, ntabwo tugikorana.”
Uyu munyarwenya avuga ko gutandukana kwabo kwatewe n’uko batari bagifite intego zimwe mu rugendo rwabo rwa ‘Comedy’.
Ati: “Ntabwo muba muuhuje inzozi. Abantu bibeshya ko ikintu gisenya amatsinda ari amafaranga, ariko siko bimeze. Ntabwo ari amafaranga, ahubwo ni inzozi.”
Seth avuga ko nubwo batagikorana nk’uko byahoze, iyo bahawe akazi bagahuriraho nk’itsinda, baragakora kandi bagahabwa ibihembo uko bisanzwe. Gusa ngo ibyo gukorana nk’itsinda rihoraho ntibikibaho.
Yagize ati: “Iyo duhawe akazi nka Zuby Comedy, njyewe na Samu turahura tugakora. Iyo bahamagaye, bahamagara Zuby Comedy, ntabwo baba bahamagaye Seth na Samu.”
Buri wese yakomeje ibikorwa bye ku giti cye
Nyuma yo gutandukana, Seth yatangiye gutegura ibitaramo birimo Iwacu Summer Comedy, ndetse yitabira n’ibindi nka Gen-Z Comedy. Yanatangije kompanyi ye bwite yise Lion Dreams, itegura ibitaramo bitandukanye.
Ku rundi ruhande, Samu we yatangije umushinga wihariye yise Comedy for Peace, nawo ugamije gukoresha urwenya mu guteza imbere amahoro n’ubumwe mu baturage.
Seth yasoje ashimangira ko nubwo batandukanye, batigeze bagirana ikibazo ku giti cyabo, ahubwo ko buri wese yiyemeje gukurikira inzozi ze.
